2025年海味業年度回顧 邊三樣海味價錢升得最多？
2025年眨眼又去到尾聲，海味業界究竟有啲乜嘢貨品價錢係有明顯嘅波動？
第一就係日本北海道乾瑤柱，由於2025年日本經歷咗比較炎熱嘅夏天，所以影響到好多海產嘅收成。其中乾瑤柱嘅收成，可以話係重創。今年新貨年尾幾批運來香港嘅乾瑤柱呢，都只係有比較細粒嘅S碼貝同埋SA 收，中碼同大碼都欠奉，所以整體乾瑤柱價錢呢比一年前貴咗差唔多$300一斤，你冇聽錯係貴咗$300一斤。 而家仲有大概幾十日嘅時間先去到農曆新年，但聽聞今年嘅收成都嚟得八八九九啦，所以話價錢應該仲有得再貴少少，大家如果有需要呢幾個月買乾瑤柱嘅話，早啲入手，一定唔會後悔。
第二樣嘢同樣受到日本熱浪影響嘅就係蠔豉啦，日本蠔其中一個重要嘅產區就廣島，當地養蠔同樣受到天氣影響，由於夏天炎熱嘅關係，令到今年廣島蠔都失收，2L 以上嘅蠔豉呢都係買少見少㗎，價錢都貴咗幾十蚊一斤。大家如果想搵啲平嘅代替品嘅，可以試吓韓國蠔豉或者大陸蠔豉啦，咁當然一分錢一分貨啦！
第三樣價錢都係上漲就係美國螺頭啦，美國螺頭呢都有分曬乾一塊塊呢一款，同埋有啲一盒盒急凍完整的。美國螺頭同樣因為今年收成呢麻麻哋，所以縱使大環境市場唔係好好，全線螺頭呢都係貴咗嘅，大概比起上年都係貴咗差唔多$100一斤左右，始終野生螺頭嘢產量呢就真係冇咁穩定，聽天由命啦。 好彩螺頭都有好多其他產區嘅代替品，例如南美洲非洲等等，大家如果想食得平啲嘅都仲有好多選擇。
查詢請致電/Whatsapp/Signal: 64089500
港榮海味雜貨 地址：土瓜灣九龍城道39號地下（港鐵土瓜灣站A出口）